ភ្នំពេញ៖ មេគណរាជធានីភ្នំពេញ និងរដ្ឋបាលរាជធានីភ្នំពេញ បើកកិច្ចប្រជុំស្ដីពីការយកសំណាកតាមវត្តអារាមក្នុងភូមិសាស្ត្ររាជធានី និងដាក់វិធានការដើម្បីទប់ស្កាត់ការរីករាលដាលជម្ងឺកូវីដ-១៩ ក្នុងកំឡុងពេលនៃពិធីបុណ្យកាន់បិណ្ឌ និងភ្ជុំបិណ្ឌ។
រសៀលថ្ងៃទី២៣ ខែកញ្ញា ឆ្នាំ២០២១ ព្រះមេគណរាជធានីភ្នំពេញ សម្ដេចព្រះពុទ្ធជ័យមុនី ឃឹម សន និងរដ្ឋបាលរាជធានីភ្នំពេញ បានរៀបចំកិច្ចប្រជុំ តាមប្រព័ន្ធអនឡាញ (Zoom meeting) ស្ដីពីការយកសំណាកតាមវត្តអារាមក្នុងភូមិសាស្ត្ររាជធានី និងដាក់វិធានការការពារតាមវិធានការសុខាភិបាល ដើម្បីទប់ស្កាត់ការរីករាលដាលជម្ងឺកូវីដ-១៩ ក្នុងកំឡុងពេលនៃពិធីបុណ្យកាន់បិណ្ឌ និងភ្ជុំបិណ្ឌ ជាមួយវត្តមានមន្ត្រីសង្ឃសាលាគណ សាលាអនុគណ និងចៅអធិការគ្រប់បណ្តាវត្តក្នុងរាជធានីភ្នំពេញ។
ការប្រជុំនេះគឺបន្ទាប់ពី នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានស្នើដល់ក្រសួងធម្មការនិងសាសនាធ្វើការពិភាក្សាជាមួយគណៈសង្ឃ និងក្រសួងសុខាភិបាល ឱ្យផ្អាក ឬបន្តពិធីបុណ្យភ្ជុំក្នុងទម្រង់ណាមួយដែលសមស្របដើម្បីកាត់បន្ថយការឆ្លងរាលដាលនៃជំងឺកូវីដ-១៩ ក្នុងពេលដែលកម្ពុជាកំពុងប្រារព្ធពិធីបុណ្យជាតិមួយនេះ បន្ទាប់ពីសម្ដេចបានបង្ហាញក្ដីបារម្ភពីការឆ្លងរាលដាលនៃជំងឹកូវីដ-១៩ក្នុងអំឡុងពិធីបុណ្យកាន់បិណ្ឌ និងភ្ជុំបិណ្ឌ។
វត្តនៅទូទាំងរាជធានីភ្នំពេញមានប្រមាណ១៥០វត្ត។ ក្នុងការប្រារព្ធពិធីបុណ្យកាន់បិណ្ឌថ្ងៃទី១ កាលពីម្សិលមិញ រដ្ឋបាលរាជធានីភ្នំពេញបានសម្រេចបិទវត្តនាគវ័ន្តដែលមានទីតាំងក្នុងខណ្ឌទួលគោកបន្ទាប់ពីរកឃើញមនុស្ស៣នាក់មានផ្ទុកជំងឺកូវីដ-១៩ក្នុងវត្ត។ នៅថ្ងៃនេះដែលជាថ្ងៃកាន់បិណ្ឌទី២ អាជ្ញាធរក៏បានអំពាវនាវដល់ពលរដ្ឋដែលបានទៅកាន់បិណ្ឌ១ នៅវត្តចំពុះក្អែក នៅក្នុងសង្កាត់ព្រែកថ្មី ខណ្ឌច្បារអំពៅទៅធ្វើតេស្តរកជំងឺកូវីដ-១៩ បន្ទាប់ពីរកឃើញមានការឆ្លង៤៥ករណីក្នុងវត្តនេះ៕
